...म्हणून मी भाजपमध्ये!

माढा लोकसभा मतदारसंघाचे खासदार रणजितसिंह नाईक निंबाळकर यांच्या रूपाने फलटण तालुक्याला तरुण व कर्तृत्वान नेतृत्व मिळाले असल्याने गेल्या २५-३० वर्षात जो विकास झाला नाही तो त्यांनी करून दाखवला. सार्वजनिक विकासकामे करून फलटण तालुक्याचा चेहरा-मोहरा बदलण्याची क्षमता फक्त आणि फक्त रणजितसिंह यांच्यात असल्याने आपण त्यांना सक्षम साथ देण्यासाठी भाजपसारख्या राष्ट्रीय पक्षात अधिकृत प्रवेश करीत असल्याची प्रतिक्रिया ज्येष्ठ नेते प्रल्हादराव साळुंखे-पाटील यांनी व्यक्त केली.

प्रल्हाद पाटील भाजपमध्ये प्रवेश करणार असल्याची चर्चा तालुकाभर होत असल्याने पाटील यांच्या पक्षप्रवेशाची खात्री करण्यासाठी आमच्या प्रतिनिधीने त्यांच्याशी थेट संपर्क करून संवाद साधला असता साळुंखे-पाटील यांनी याला दुजोरा दिला.

अनेक वर्ष प्रलंबित असणारा पाणीप्रश्न अखेर निकालात काढण्यास खासदारांना यश आले. तालुक्यावरील दुष्काळी कलंक दूर करण्यासाठी देवेंद्र फडणवीस यांनी सहकार्य केले. हजारो कोट्यावधीचा आर्थिक निधी दिला. तालुक्याला त्यांनी भरभरून दिले. सत्ताधाऱ्यांनी पाणी प्रश्नावर राजकारण करून सत्तेत बसून तालुक्यातील जनतेला झुलवत ठेवले. याला चोख प्रत्युत्तर खासदार रणजितसिंह यांनी दिले असल्याचे सांगत तालुक्यातील नाईकबोमवाडी येथे औद्योगिक वसाहतीचे (एमआयडीसी) उद्घाटन उपमुख्यमंत्री देवेंद्रजी फडणवीस यांच्याहस्ते होणार आहे त्यामुळे तालुक्यातील बेरोजगारी कमी होणार असल्याने युवावर्गाने खासदारांच्या पाठीशी खंबीरपणे उभे राहावे अशी अपेक्षा साळुंखे-पाटील यांनी व्यक्त केली आहे.

तालुक्यात विविध विकासकामांचे भूमिपूजन व उद्घाटन उपमुख्यमंत्री यांच्या हस्ते होणार आहे. यशवंतराव चव्हाण हायस्कूलच्या मैदानावर उपमुख्यमंत्री यांची जंगी जाहीर सभा होत असून यावेळी फलटणकरांच्यावतीने फडणवीस साहेबांचे आभार व खासदार रणजितसिंह यांच्या विकासकामातील योगदानाबद्दल त्यांच्या पाठीवर शाबासकीची थाप मारण्यासाठी तालुकावासियांनी जाहीर सभेला उपस्थित राहण्याचे आवाहन प्रल्हादराव साळुंखे पाटील यांनी आमच्या प्रतिनिधीशी बोलताना केले आहे.