ज्येष्ठ नेते सुभाषराव शिंदे यांच्यावर अंत्यसंस्कार

शिंदेवाडी (ता.फलटण) : राष्ट्रवादी काँग्रेस पक्ष व शरद पवार यांचेवर गेली अनेक वर्षांपासून निष्ठा ठेवणारा व समाजात प्रामाणिक काम करणारा निष्ठाप्रेमी तारा म्हणून ओळख असणारे सुभाषराव शिंदे यांच्यावर हजारो लोकांच्या उपस्थितीत अंत्यसंस्कार करण्यात आले. राजकारणात अनेकांना मोठे करणारा, तरुणांना प्रेरणा व ऊर्जा देणारा, धाडसी, आक्रमक परखड बोलणारा, संकटाशी दोन हात करीत लढणारा अशा शब्दात स्व. शिंदे यांच्या अंत्यसंस्कारवेळी अनेकांनी त्यांना श्रद्धांजली अर्पित केली.

दि.१३ रोजी दुपारी ४ वाजता सुभाषभाऊंनी पुणे येथील रुग्णालयात अखेरचा श्वास घेतल्यानंतर त्यांच्या निधनाची बातमी तालुक्यासह संपूर्ण जिल्ह्यात वाऱ्यासारखी पसरली होती. त्यांचे पार्थिव पुण्याहून दि.१४ रोजी पहाटे फलटण येथील 'जिद्द' बंगल्यावर आणण्यात आल्यानंतर अंतिम दर्शनासाठी फलटण शहर व तालुकावासीयांनी मोठी गर्दी केली होती. अंतिम दर्शनानंतर शिंदेवाडी येथील त्यांच्या मूळ गावी हजारोंच्या उपस्थितीत त्यांच्यावर अंत्यसंस्कार करण्यात आले.

दरम्यान, खासदार रणजितसिंह नाईक-निंबाळकर, आमदार दीपक चव्हाण, श्रीमंत संजीवराजे नाईक-निंबाळकर, जिल्हा बँकेचे अध्यक्ष नितीन पाटील, जिल्हा पत्रकार संघाचे अध्यक्ष हरीश पाटणे, राष्ट्रवादीचे जिल्हाध्यक्ष सुनील माने, माजी सनदी अधिकारी प्रभाकर देशमुख, काँग्रेसचे ज्येष्ठ नेते अच्युतराव खलाटे, ॲड.नरसिंह निकम यांच्यासह अनेक मान्यवरांनी स्वर्गीय सुभाष भाऊ यांना श्रद्धांजली अर्पण केली.

अंत्यविधी संस्कारप्रसंगी प्रल्हादराव साळुंखे पाटील, डि.के.पवार, दिलीपसिंह भोसले, अभयसिंह जगताप, रविंद्र बेडकिहाळ, महेंद्र सूर्यवंशी बेडके, धनंजय साळुंखे पाटील यांच्यासह तालुक्यातील विविध क्षेत्रातील मान्यवर, ग्रामीण भागातील नागरिक हजारोंच्या संख्येने उपस्थित होते.