फलटण बाजार समितीच्या १४ जागांसाठी २४ उमेदवार निवडणूक रिंगणात

एकता दर्शन : फलटण कृषी उत्पन्न बाजार समितीच्या पंचवार्षिक निवडणूक प्रक्रियेतील उमेदवारी अर्ज माघारी घेण्याच्या अखेरच्या दिवशी ८१ उमेदवारी अर्ज माघारी घेण्यात आले असून १८ जागांसाठी हि निवडणूक होत असून पैकी ४ उमेदवार बिनविरोध निवडून आले आहेत. उर्वरित १४ जागांसाठी २४ उमेदवार निवडणूक रिंगणात उभे राहिले आहेत.

बिनविरोध निवडून आलेल्या उमेदवारांमध्ये ग्रामपंचायत अनुसूचित जाती जमाती मतदारसंघातून अक्षय शामराव गायकवाड, इतर मागास प्रवर्गातून तुळशीराम शिंदे, हमाल मापाडी मतदारसंघातून निलेश कापसे, ग्रामपंचायत आर्थिक दुर्बल घटक मतदारसंघातून संतोष जगताप यांचा समावेश आहे.

१८ जागांपैकी ४ जागा बिनविरोध झाल्याने उर्वरित १४ जागांसाठी २४ उमेदवार निवडणूक रिंगणात उभे राहिल्याने कृषी उत्पन्न बाजार समितीची निवडणूक अटळ ठरली आहे. दिनांक २१ रोजी निवडणूक निर्णय अधिकारी यांच्या कार्यालयात उमेदवार यादी प्रसिद्ध केली जाणार असून यावेळी चिन्हांचे वाटप केले जाणार आहे. 

दिनांक ३० एप्रिल रोजी सकाळी ७ ते दुपारी ४ वाजेपर्यंत मतदान होईल व त्याचदिवशी मतमोजणीनंतर निकाल जाहीर केला जाणार असल्याची माहिती निवडणूक निर्णय अधिकारी सुनील धायगुडे यांनी दिली.