फलटण अंतर्गत पालखी मार्ग व चौकांचे सुशोभीकरण कामांसाठी ८० कोटींची मागणी

एकता दर्शन (फलटण) : फलटण शहराला ऐतिहासिक परंपरा आहे. छत्रपती शिवाजी महाराज यांची सासरवाडी, छत्रपती संभाजी महाराज यांचे आजोळ, महानुभाव पंथीयांची दक्षिण काशी अशी शहराची ओळख आहे. याचबरोबर संतश्रेष्ठ श्री ज्ञानेश्वर महाराजांची पालखी फलटणमधुन पंढरपूरकडे जाते. असे ऐतिहासिक व अध्यात्मिक महत्व असल्याने फलटण शहरातील अंतर्गत मार्ग आणि चौकांचे सुशोभीकरण अनिवार्य असल्याच्या पार्श्वभूमीवर खासदार रणजितसिंह नाईक-निबांळकर यांनी रस्ते, परिवहन व महामार्ग खात्याचे केंद्रीय मंत्री ना. नितीन गडकरी यांच्याकडे ८० कोटी रुपये निधीची मागणी केली असून ना. गडकरी यांनी सदरचा निधी लवकरच उपलब्ध करून देणार असल्याचे आश्वासन दिले आहे.

केंद्र शासनाच्या रस्ते विकास मंत्रालयाने हाती घेतलेले आळंदी ते पंढरपूूर पालखी मार्गाचे काम सध्या वेगात सुरु आहे. मात्र, हा मार्ग फलटण शहराच्या बाहेरून होत आहे. संतश्रेष्ठ श्री ज्ञानेश्वर माऊलींचा पालखी सोहळा प्रत्यक्ष मुक्कामासाठी शहरात येत असतो त्यामुळे शहरातील आगमन आणि प्रस्थान करणारे मार्ग व या मार्गादरम्यानचे सर्व चौक सुशोभित व्हावेत हि संकल्पना खासदार रणजितसिंह यांची असल्यामुळे त्यांनी ना. गडकरी यांच्याकडे संबधीत कामांसाठी ८० कोटी निधीची मागणी केली असून या कामासाठी लागणारा निधी आपण त्वरित देणार असल्याचे आश्वासन मंत्री गडकरी यांनी दिले आहे.

माऊलींचा पालखी सोहळा मलठण, उंब्रेश्वर चौक, पाच बत्ती चौक, श्रीराम मंदिर, गजानन चौक, म. फुले चौक, श्रीमंत मालोजीराजे पुतळा, गिरवी नाका या मार्गावरून सरळ विमानतळातील पालखी तळावर मुक्कामासाठी विसावतो, मुक्कामानंतर पालखी सोहळ्याचे प्रस्थान होणाऱ्या सर्व चौकातील (डॉ. बाबासाहेब आंबेडकर, छत्रपती शिवाजी महाराज, ज्ञानेश्वर महाराज मंदिर, डीएड चौक) रस्ते व चौकांचे सुशोभीकरण आदी कामांचा समावेश आहे.

सध्या दिल्लीच्या संसदेत या भागाचे प्रतिनिधित्व खासदार रणजितसिंह करीत असल्याने विकास कामांसाठी लागणारा केंद्रातील निधी या भागाला मोठ्या प्रमाणात मिळू लागल्याने विकासकामे होण्याचे प्रमाणही वाढत असल्याचे स्पष्ट होवु लागले आहे.