फलटण तालुका पत्रकार संघाला राज्यस्तरीय पुरस्कार

फलटण तालुका मराठी पत्रकार परिषदेला यावर्षीचा राज्यस्तरीय 'स्व. वसंतराव काणे आदर्श पत्रकार संघ' पुरस्कार मिळाला असून या पुरस्काराचे वितरण दि. ६ रोजी गंगाखेड जि. परभणी येथे समारंभपूर्वक होणार आहे. अखिल भारतीय मराठी पत्रकार परिषदेच्या वतीने राज्यातील परिषदेच्या तालुका पत्रकार संघाला उल्लेखनीय काम केल्याच्या पार्श्वभूमीवर प्रतिवर्षी राज्यस्तरीय पुरस्कार दिला जातो. यावर्षी राज्यातील ८ आदर्श तालुका पत्रकार संघाना पुरस्कार जाहीर करण्यात आले आहेत. यामध्ये पुणे विभागातून फलटण तालुका पत्रकार संघाचा समावेश आहे.

फलटण : शुक्रवार, दिनांक ६ मे रोजी सकाळी ९:३० वाजता गंगाखेड जि. परभणी येथे राज्यस्तरीय पत्रकार मेळावा आणि आदर्श पत्रकार संघ पुरस्कार वितरण सोहळा असा संयुक्त कार्यक्रम महाराष्ट्र राज्याचे माजी मुख्यमंत्री व विरोधी पक्ष नेते देवेंद्र फडणवीस यांच्या प्रमुख उपस्थितीत होणार आहे. या कार्यक्रमाचे अध्यक्षस्थान परिषदेचे मुख्य विश्वस्त एस.एम. देशमुख भूषविणार आहेत. व कार्यक्रमाचे स्वागताध्यक्ष आमदार डॉ. रत्नाकररावजी गुट्टे असून यावेळी आयबीएन लोकमतचे न्यूज अँकर विलास बडे, आमदार सुरेश वरपुडकर, आमदार मेघनाताई बोर्डीकर, आमदार राहुल पाटील, राजेश विटेकर, राज्य मराठी पत्रकार परिषदेचे विश्वस्त किरण नाईक, माजी आमदार मोहन फड, गंगाखेड तालुका पत्रकार संघाचे अध्यक्ष गजानन नाईक, कार्यध्यक्ष शरद पाभळे, महिला आघाडी प्रमुख जान्हवी पाटील आदी प्रमुख मान्यवर उपस्थित राहणार असल्याचे परिषदेचे राज्य प्रसिद्धी प्रमुख अनिल महाजन यांनी सांगितले आहे.

पुरस्काराचे स्वरूप स्मृतिचिन्ह व मानपत्र असे असून पुरस्कार प्राप्त तालुका पत्रकार संघांचे पदाधिकारी कार्यकारिणी यांनी उपस्थित रहावे असे आवाहन अखिल भारतीय मराठी पत्रकार परिषदेच्या वतीने करण्यात आले आहे.

फलटण पत्रकारितेच्या इतिहासातील पहिला पुरस्कार  

मराठी पत्रकार परिषदेचे मुख्य विश्वस्त एस.एम. देशमुख व सातारा जिल्हाध्यक्ष हरिष पाटणे यांच्या नेतृत्वाखाली फलटण तालुका पत्रकार संघाने विविध सामाजिक उपक्रम राबविलेच्या पार्श्वभूमीवर तालुक्याच्या पत्रकारितेच्या इतिहासात पहिल्यांदाच फलटण पत्रकार संघाला राज्यस्तरीय पुरस्कार मिळाला असल्याने आगामी काळात नाविन्यपूर्ण काम करण्याची प्रेरणा आणि ऊर्जा या पुरस्कारामुळे मिळणार असल्याचे फलटण तालुका मराठी पत्रकार परिषदेचे अध्यक्ष प्रा. रमेश आढाव यांनी यावेळी सांगितले.

पुरस्कार प्राप्त तालुका पत्रकार संघ विभागनिहाय पुढील प्रमाणे :

लातूर विभाग : नायगाव तालुका पत्रकार संघ, जि. नांदेड, औरंगाबाद विभाग : सिल्लोड तालुका पत्रकार संघ, जि. औरंगाबाद, कोल्हापूर विभाग : सावंतवाडी तालुका पत्रकार संघ, जि. सिंधुदुर्ग, कोकण विभाग : गुहाघर तालुका पत्रकार संघ, जि. रत्नागिरी, नाशिक विभाग : जामखेड तालुका पत्रकार संघ, जि. अहमदनगर, पुणे विभाग : फलटण तालुका पत्रकार संघ, जि. सातारा, अमरावती विभाग : रिसोड तालुका पत्रकार संघ, जि. वाशीम, नागपूर विभाग : नरखेडा तालुका पत्रकार संघ, जि. नागपूर.