फलटणमध्ये पाकिस्तानच्या परराष्ट्र मंत्र्याविरोधात जोडे मारो आंदोलन

एकता दर्शन (फलटण) : पाकिस्तानचे परराष्ट्रमंत्री बिलावल भुट्टो जरदारी यांनी भारताचे पंतप्रधान नरेंद्र मोदी यांच्याबाबत वादग्रस्त वक्तव्य केल्याच्या निषेधार्थ माढा लोकसभा मतदार संघातील भाजपाचे खासदार रणजितसिंह नाईक-निंबाळकर यांच्या नेतृत्वाखाली दि. १७ रोजी सकाळी ११ वाजता फलटणमध्ये भुट्टो यांच्या प्रतीकात्मक पुतळ्याला जोडे मारून आंदोलन करण्यात आले.

फलटण शहर व तालुक्यातील आक्रमक झालेल्या भाजप पदाधिकारी, कार्यकर्त्यांनी खासदार रणजितसिंह यांच्या प्रमुख उपस्थित एकत्र येऊन येथील डॉ. बाबासाहेब आंबेडकर चौकात पाकिस्तानचे परराष्ट्रमंत्री बिलावल भुट्टो यांच्या विरोधात घोषणा देत त्यांचा जाहीर निषेध केला.

पाकिस्तानी मंत्र्याची पंतप्रधान नरेंद्र मोदी यांच्यावर बोलण्याची लायकी नसून पंतप्रधान मोदींची इमेज विश्वव्यापी आहे. अशा नेत्यावर त्यांनी बोलणे म्हणजे स्वतःहून पाकिस्तानवर संकट ओढवून घेणारी कृतीच म्हणावी लागेल. यापुढे बोलताना त्यांनी विचार करून बोलावे अन्यथा याचा गंभीर परिणाम पाकिस्तानला भोगावा लागणार असल्याचा इशारा खासदार रणजितसिंह यांनी यावेळी दिला.

या आंदोलनात शहर व तालुक्यातील भाजप पदाधिकारी कार्यकर्ते मोठया संख्येने सहभागी झाले होते.