फलटण, माळशिरसमधील विद्यार्थ्यांचे मॅथ्स जीनियस ओलंपियाड स्पर्धेत नेत्रदीपक यश

गणितासारख्या अवघड विषयासंबंधी विद्यार्थ्यांच्यामध्ये आवड व गोडी निर्माण व्हावी या हेतूने केंद्रीय माहिती तंत्रज्ञान व व्यवसाय प्रशिक्षण मंडळ यांच्या संयुक्त पुढाकाराने आयोजित "मॅथ्स जीनियस ओलंपियाड" नावाच्या स्पर्धापरीक्षेत फलटण व माळशिरस तालुक्यातील विविध शाळेतील विद्यार्थ्यांनी आपला सहभाग नोंदवून नेत्रदीपक यश संपादन केले आहे.

या स्पर्धापरीक्षेत इयत्ता १ ली ते ७ वी पर्यंतचे विद्यार्थी सहभागी झाले होते. प्रत्येक इयत्तामधून पाच विजेते विद्यार्थी घोषित करण्यात आले. विजेत्या विद्यार्थ्यांना गोल्ड, सिल्वर, ब्राँझ, कॉपर मेडल व प्रमाणपत्र या स्वरूपात बक्षीस देऊन गौरविण्यात आले.

गणित विषयाविषयी गोडी निर्माण करणाऱ्या स्पर्धांमध्ये मोठ्या संख्येने विद्यार्थ्यांचा सहभाग वाढवा, गणित विषयाची विद्यार्थ्यांमधून भीती जावी, एक प्रकारचा आनंददायी विषय बनावा यासाठी प्रयत्न केला जात असून बुद्धिमान, बलशाली व सक्षम भारत बनवण्याचा उद्देश या स्पर्धा आयोजित करण्यामागे आहे.

अविनाश अनंत कुलकर्णी व सौ.कल्याणी अविनाश कुलकर्णी या दोघा उभयतांनी या परीक्षेचे काम पाहिले असून शालेय विद्यार्थ्यांना शिक्षण प्रक्रियेतून संशोधनात्मक प्रयोग उपलब्ध करून देण्याचे काम श्री व सौ.कुलकर्णी सातत्याने करीत आहेत.

या परीक्षेत श्रीमंत मालोजीराजे प्राथमिक विद्यामंदिर (फलटण), जिल्हा परिषद प्राथमिक शाळा (विडणी), जिल्हा परिषद प्राथमिक शाळा (झिरपवाडी), जिल्हा परिषद प्राथमिक शाळा (इरिगेशन बंगला, कोळकी), जिल्हा परिषद प्राथमिक शाळा (राऊतवाडी, विडणी), बाळकृष्ण जयवंत दाते प्रशाला (नातेपुते), स्वर्गीय शिलादेवी शरदकुमार दोशी प्राथमिक विद्यामंदिर (कोळकी) आदी शाळेतील विद्यार्थ्यांनी सहभाग घेतला. यशस्वी विद्यार्थ्यांचे विविध स्तरातून अभिनंदन होत आहे.