आयडियलच्या बालचमूंचा नेत्रदीपक रिंगण सोहळा

एकता दर्शन, फलटण : येथील आयडियल इंटरनॅशनल स्कुलमधील वारकरी वेशातील बालचमूंचा नेत्रदीपक रिंगण सोहळा माऊली भक्तांसाठी आकर्षण ठरला.

आयडियल इंटरनॅशनल स्कूल प्रतिवर्षी भारतीय सण उत्सवाची परंपरा जपण्याचे विविध उपक्रम राबवित असते. पालखी सोहळ्याच्या पार्श्वभूमीवर विद्यार्थ्यांचा रिंगण सोहळा दिमाखात पार पडला.

विठ्ठल-रखुमाई, संत ज्ञानेश्वर, संत निवृत्तीनाथ, संत सोपान देव, संत मुक्ताई, संत सावता माळी, संत तुकाराम, संत चोखामेळा, संत सखुबाई, संत जनाबाई व अन्य संतांच्या वेशभूषा करीत विद्यार्थ्यांनी रिंगण सोहळा पूर्ण केला. यावेळी ह.भ.प.भारत सावंत महाराज व डॉ.वैशाली शिंदे यांची प्रमुख उपस्थिती होती.

संतांच्या वेशभूषा धारण करणाऱ्या विद्यार्थ्यांनी हातात भगवे झेंडे, डोक्यावर तुळशी वृंदावन घेतल्याने विद्यार्थी खरंच पंढरीच्या वारीला निघाल्याचा भास होत होता. एरवी शाळेच्या गणवेशात असलेली लहान मुलं आज मात्र संतांच्या वेशात दिसत होती. त्यामुळे "विठ्ठल नामाची शाळा भरली" असल्याचे चित्र दिसत होते. विठ्ठल रखुमाईच्या भक्तीत बाल वारकरी शाळेमध्ये अवतरल्यामुळे ज्ञान मंदिरात भोळ्या विठ्ठलाचा जयघोष, हरिनामाचा गजर अशा भावमय वातावरणामुळे अवघे विद्यार्थी भक्तीरसात तल्लीन झाल्याचे चित्र होते.

रिंगण सोहळा दरम्यान संत विचार, संत गीते आणि नृत्याचे सादरीकरण लहान विद्यार्थ्यांनी केले. ज्याप्रमाणे पालखी सोहळ्यात विविध उपक्रम राबविले जातात त्याच धर्तीवर या विद्यार्थ्यांनी कृतीद्वारे विविध उपक्रम सादर केले. विद्यार्थ्यांच्या या आनंदात अवघ्या शाळेतील शिक्षक, कर्मचारी, पालक यांनी आपला सहभाग नोंदविला होता.

आषाढी वारीची परंपरा व संस्कृती जपण्याचे काम या सोहळ्याद्वारे विद्यार्थ्यांनी केले आहे. आरती, नृत्य, घोडे रिंगण व दिंडी याचे नियोजन संस्थेच्या संस्थपिका डॉ.वैशाली शिंदे यांनी केले होते. या स्कुलच्या सोहळ्यामुळे विद्यार्थ्यांना प्रेरणा व ऊर्जा मिळणार असून आयुष्यात वारकरी परंपरा अवगत करण्यास मदत होणार आहे. बालचमूंच्या या सोहळ्याचे विविध स्तरातून कौतुक केले जात आहे.