फलटण येथे रेकॉर्डब्रेक गर्दीत धम्मचक्र प्रवर्तन दिन व भीमगीतांचा कार्यक्रम

"तुम्ही खाता त्या भाकरीवर, बाबासाहेबांची सही हाय..रं" या सुप्रसिद्ध भीमगीताला प्रेक्षकांनी उत्स्फूर्त प्रतिसाद देत अक्षरशः डोक्यावर घेतल्याचे चित्र ६६ व्या धम्मचक्र प्रवर्तन दिनानिमित्त आयोजित केलेल्या कार्यक्रमात दिसून आले.

६६ व्या धम्मचक्र प्रवर्तन दिनाचे औचित्य साधून सोनिया चॅरिटेबल ट्रस्टने महाराष्ट्रातील सुप्रसिद्ध गायिका कडुबाई खरात यांच्या भीमगीतांचा कार्यक्रम आयोजित केला होता. या कार्यक्रमात संपूर्ण महाराष्ट्रभर गाजत असलेले उपरोक्त गीत खरात यांनी मंचावर सादर करताच लहानांपासून वयोवृद्ध पर्यंतच्या प्रेक्षकांनी या गाण्याला उत्स्फूर्त प्रतिसाद दिला. दरम्यान या गीताचे सादरीकरण करणाऱ्या गायिका कडुबाई खरात, गायक उमेश गवळी, रिल स्टार बुद्धीतेजा बोदडे, शिवानी  कांबळे, कपिल मोरे व अन्य उपस्थित कलाकारांचा मान्यवरांच्या हस्ते सन्मान करण्यात आला. 

प्रारंभी विधान परिषदेचे माजी सभापती आमदार श्रीमंत रामराजे नाईक निंबाळकर व आमदार दीपक चव्हाण यांच्याहस्ते तथागत भगवान गौतम बुद्ध व डॉ. बाबासाहेब आंबेडकर यांच्या प्रतिमांना पुष्प अर्पित करून अभिवादन करण्यात आले. यावेळी ट्रस्टच्यावतीने आंबेडकर चळवळीतील कार्यकर्ते, पत्रकार, आणि  सामाजिक कार्यकर्ते यांचा सत्कार माजी नगरसेवक सनी अहिवळे यांच्या हस्ते करण्यात आला

याप्रसंगी श्रीमंत रामराजे नाईक निंबाळकर म्हणाले, राजकारणात सुरवातीपासूनच आपल्याला मंगळवार पेठेतील नागरिकांनी उत्तम सहकार्य केले व यापुढेही करतील अशी अपेक्षा व्यक्त करीत डॉ. बाबासाहेबांनी शिका, संघटित व्हा, आणि संघर्ष करा या दिलेल्या संदेशाचे पालन कार्यकर्त्यांनी केले पाहिजे. सामाजिक चळवळींना ज्ञानाचे अधिष्ठान असले पाहिजे यासाठी समाजाने शिक्षणाला प्राधान्य द्यावे. शिक्षणातून पिढी घडत असते. बाबासाहेबांनी हेच आदर्शवत काम समाजासमोर निर्माण केले आहे.

लोकप्रिय आमदार चव्हाण म्हणाले, भगवान गौतम बुद्धांचे विचार तळागाळापर्यंत पोहचवण्यासाठी बौद्ध समाज हा इतर बहुजन समाजाला बरोबर घेऊन काम करीत आहे, आणि हेच काम लोकशाहीला पूरक असल्याचे मत यावेळी त्यांनी व्यक्त केले.

दरम्यान सामाजिक विषयांवर आधारित असलेली "चांडाळ चौकडीच्या करामती" या वेबसिरीजमधील कलाकारांचा सन्मान आमदार रामराजे नाईक निंबाळकर यांच्या हस्ते करण्यात आला. यावेळी व्यासपीठावर प्रा. भीमदेव बुरुंगले, ज्येष्ठ पत्रकार अरविंद मेहता, शामराव अहिवळे, प्रा. रमेश आढाव, यशवंत खलाटे, डॉ. सुभाष गायकवाड, ॲड. रोहित अहिवळे, दत्ता अहिवळे, विकास काकडे, विजय येवले, मधुकर काकडे, सचिन मोरे, शक्ती भोसले, विजय भिसे, अनमोल जगताप, सनी काकडे, मंगेश आवळे, महादेव गायकवाड आदी उपस्थित होते.

कार्यक्रम यशस्वी करण्यासाठी माजी नगरसेवक सनी अहिवळे (दादा), त्यांच्या सुविद्य पत्नी सौ. सुपर्णा अहिवळे, हरीश उर्फ आप्पा काकडे, संग्राम अहिवळे, सिद्धार्थ अजित अहिवळे, शिवा अहिवळे, ट्रस्टचे सर्व कार्यकर्ते व पदाधिकारी  यांनी परिश्रम घेतले. कार्यक्रमाचे सूत्रसंचालन आनंद पवार यांनी केले. आभार सोनिया चॅरिटेबल ट्रस्टच्या अध्यक्षा सौ. सुपर्णा अहिवळे यांनी मानले. या कार्यक्रमास शहर व तालुक्यातील भीमसैनिक मोठ्या संख्येने उपस्थित होते.

आमदार रामराजेंनी घेतला भीमगीतांचा आस्वाद : 

महाराष्ट्रातील सुप्रसिद्ध गायिका कडुबाई खरात यांनी गायलेल्या सुरवातीच्या एक दोन भीमगीतांचा आस्वाद श्रीमंत रामराजे यांनी प्रेक्षकांच्या अग्रभागी बसून घेतला असल्याचे बोलके चित्र यावेळी ठळकपणे दिसत होते. दरम्यान उपस्थित अनेकांना त्यांच्यासोबत सेल्फी काढण्याचा मोह टाळता आला नाही.