राष्ट्रीय सेवा योजनेतील विद्यार्थ्यांची वारकरी सेवा

फलटण : संतश्रेष्ठ श्री ज्ञानेश्वर महाराज यांचा पालखी सोहळा १ व २ जुलै रोजी फलटण मुक्कामी होत. या पालखी सोहळ्यात सुमारे पाच लाखांवर भाविक सहभागी आहेत. अशावेळी वारकऱ्यांना सेवा, सुविधा, स्वच्छता अभियान आणि जनजागृतीसाठी स्वयंसेवकांची आवश्यकता असल्याने राष्ट्रीय सेवा योजनेची 'एनएसएस दिंडी' माऊलींच्या सोहळ्यात सहभागी आहे.

यावर्षी 'एनएसएस' दिंडीत राज्यामधून ८ विद्यापीठांतील १७० राष्ट्रीय सेवा योजनेच्या स्वयंसेवकाचा समावेश असून पालखी सोहळा फलटण तालुक्यात सर्व मुक्कामस्थळी असताना या स्वंयसेवकांनी स्वच्छता अभियान राबविले. या स्वच्छता अभियानांतर्गत स्वच्छता जागृती, प्रबोधन,  स्वच्छ वारी, स्वस्थ वारी, निर्मल वारी, हरित वारी, लोकशाही वारी, निसर्गवारी या विषयावर राष्ट्रीय सेवा योजनेचे स्वयंसेवक पथनाट्य सादर करत आहेत.

पुणे आळंदी पासून 'एनएसएस'चे स्वयंसेवक विद्यार्थी पालखीत सहभागी झाले असून पंढरपूरपर्यंत कचरा उचलणे, स्वच्छता करणे, वारकऱ्यांना मदत करणे, मानवी साखळी तयार करून गर्दीवर नियंत्रण ठेवणे, स्वछ भावनेने सेवा करणे, मतदान जागृती करणे, विविध सामाजिक विषयावर आधारित मार्गदर्शन करणे, यासह संबधीत ठिकाणचे सामाजिक व आर्थिक सर्वेक्षण करणे आदी विविध उपक्रम पालखी सोहळ्या दरम्यान 'एनएसएस'च्या विद्यार्थ्यांमार्फत राबविले जात असल्याचे प्रा. नामदेव बांगर यांनी सांगितले आहे.

'एनएसएस' दिंडीत सहभागी असलेले प्राध्यापक डॉ. राजकुमार रिकामे म्हणाले, वारीतील स्वच्छतेसोबत यावर्षी प्रामुख्याने 'लोकशाही वारी' संकल्पना मांडण्यात येत आहे. यातून मतदान जागृती करणे हा हेतू आहे. देशाची लोकशाही सुदृढ व सक्षम बनवण्यासाठी मतदान जागृतीची गरज असून या देशाचा नागरिक म्हणून प्रत्येकाने आपला मतदानाचा हक्क बजावणे नितांत गरज असल्याचे डॉ. रिकामे यांनी सांगितले. पालखी सोहळ्यात सहभागी असलेल्या राष्ट्रीय सेवा योजनेतील स्वयंसेवक विद्यार्थ्यांना डॉ. विकास कर्डीले, डॉ. संदीप देशमुख, डॉ. वैशाली वाघुले, प्रा. शालिनी घुमरे, दिनेश जाधव, स्वामीराज भिसे, ऋषिकेश चव्हाण हे मार्गदर्शन करत आहेत.