फलटणकरांचा पालखी सोहळ्याला भावुक निरोप

फलटण : पाऊले चालती पंढरीची वाट सुखी संसाराची सोडूनिया गाठ... या अभंगवाणीप्रमाणे संतश्रेष्ठ श्री ज्ञानेश्वर माऊलींचा पालखी सोहळा फलटणनगरीतील दोन दिवसांच्या मुक्कामानंतर दिनांक ३ रोजी सकाळच्या प्रहारी हजारो फलटणवासियांच्या उपस्थितीत मार्गस्थ झाला. पालखी सोहळ्याचे दर्शन घेत फलटणकरांनी सोहळ्याला भावुक निरोप दिला. पालखी सोहळा सातारा जिल्ह्यातील शेवटच्या मुक्कामासाठी म्हणजे फलटण तालुक्यातील बरड गावातील पालखी तळावर एक दिवस मुक्काम करून, दिनांक ४ रोजी सोलापूर जिल्ह्यात प्रवेश करणार आहे.

फलटणनगरीतील विस्तीर्ण अशा विमानतळावर असणाऱ्या पालखी तळावर दोन दिवस विश्रांती घेतलेल्या श्री संतश्रेष्ठ ज्ञानेश्वर माऊलींच्या पालखी सोहळ्यातील 'संत ज्ञानेश्वर माऊली देवस्थान ट्रस्ट'चे सेवेकरी भालदार चोपदार हे पहाटेच जागी झाले आणि ज्ञानरायांना पंढरीच्या मार्गावर पुढील प्रवासासाठी नेण्याची घाई त्यांनी सुरू केली.

सकाळच्या प्रहारातील ताळ मृदूंगाच्या वातावरणातच पालखी सोहळा शहरातून निघाला. लाखो वारकरी व भाविकांच्या समवेत पालखी सोहळा विमानतळावरून थेट येथील नाना पाटील चौकात आला, त्यावेळी फलटणवासियांनी माऊलींच्या दर्शनासाठी गर्दी करून चौकातून पालखी सोहळा पुढे जात असताना माऊलींच्या दर्शनाचा लाभ घेतला.

चौकातून पालखी सोहळा पुढे जात पंढरपूर पुलावरून श्रीराम कारखाना ते विडणी पुलदरम्यान रस्त्याच्या दुतर्फा असणाऱ्या प्राचीन वडाच्या झाडाची सावली माऊलींचे स्वागत करीत असल्याच्या भावना अनेकांनी व्यक्त केल्या. निरा उजवा कालव्याचा पूल ओलंडून सोहळा शहराचा निरोप घेऊन पुढे मार्गस्थ झाला. पुढे पालखी सोहळा विडणी येथे विसाव्यासाठी पोहोचला, त्यावेळी विडणी ग्रामपंचायतीच्या वतीने सरपंच रुपाली अभंग, उपसरपंच आशा मदने, सर्व ग्रामपंचायत सदस्य यांच्यासह डॉ. बाळासाहेब शेंडे यांनी सोहळ्याचे स्वागत केले. दरम्यान, विडणी पंचक्रोशीतील ग्रामस्थांनी माऊलींच्या पालखीवर पुष्पवृष्टी करून माऊलींचे दर्शन घेतले. याप्रसंगी माऊलींची पूजा गावकऱ्यांच्यावतीने राजेंद्र पवार, सौ. अर्चना पवार यांच्या हस्ते करण्यात आली.

पहिल्या विसाव्यानंतर पालखी सोहळा पिंपरद गावच्या दिशेने मार्गस्थ झाला. पिंपरद येथील न्याहरीनंतर माऊलींचा पालखी सोहळा वाजेगाव (निंबळक) येथे पोहोचला त्यावेळी वाजेगाव ग्रामीण भागातील भाविकांनी माऊलींच्या दर्शनासाठी फार मोठी गर्दी केल्याचे चित्र होते, यावेळी भाविकांसह वारकऱ्यांमध्ये उत्साह आणि चैतन्य निर्माण करणाऱ्या अध्यात्मिक कृती, माऊलींचा जयघोष, टाळ मृदूंगाचा गजर सुरू होता.