मतदार भाजपला निवडणुकीत धडा शिकवणार

फलटण : भारतीय संविधान आणि लोकशाही उध्वस्त करू पाहणाऱ्या भाजपला लोकसभा निवडणुकीत मतदार योग्य धडा शिकवणार असल्याचे सांगत डॉ.बाबासाहेब आंबेडकरांनी लिहिलेले संविधान आपण बदलू देणार नसल्याचा इशारा राष्ट्रवादी काँग्रेस पक्षाचे नेते खासदार शरद पवार यांनी भाजपला दिला आहे.

माढा लोकसभा मतदारसंघातील महाविकास आघाडीचे अधिकृत उमेदवार धैर्यशील मोहिते-पाटील यांच्या प्रचारार्थ फलटण येथील गजानन चौकात आयोजित प्रचार सभेत शरद पवार बोलत होते. यावेळी माजी उपमुख्यमंत्री विजयसिंह मोहिते-पाटील, माढा लोकसभा उमेदवार धैर्यशील मोहिते-पाटील, श्रीमंत रघुनाथराजे नाईक-निंबाळकर, अनिकेतराजे, विश्वजीतराजे सत्यजितराजे, श्रीमंत सुभद्राराजे नाईक निंबाळकर, श्रीमंत शिवांजलीराजे नाईक निंबाळकर, श्रीमंत प्रियालक्ष्मीराजे नाईक निंबाळकर, सौ.प्रतिभाताई चेतन शिंदे, सक्षणा सलगर, अनिल देसाई, उद्धव बाळासाहेब ठाकरे गटाचे विकास नाळे, राजू निकम, शंभूराज खराटे, डॉ.विजयराव बोरावके, चेतन शिंदे, बजरंग खटके, सह्याद्रीभैया कदम, आम आदमी पार्टीचे धैर्यशील लोखंडे, विजयराव भगत, राष्ट्रवादी जिल्हाध्यक्ष सुनील माने आदी प्रमुख मान्यवर उपस्थित होते.

खासदार शरद पवार पुढे म्हणाले, भारतीय जनता पार्टीचे काही खासदार भारतीय राज्यघटना बदलण्याची भाषा करतात. मोदींना राजकीय ताकद द्यावी असे म्हणतात. लोकशाही, संविधानावर गदा आणण्याचे काम करणाऱ्यांना सर्वसामान्य मतदारांनी या निवडणुकीत धडा शिकवावा. आपण राज्य आणि देशाच्या राजकारणात गेली ५६ वर्षं काम करीत आहे. सत्ता येथे आणि जाते. सत्ताधाऱ्यांनी आपले पाय जमिनीवर ठेवूनच काम करावे. सत्तेची हवा डोक्यात असणाऱ्यांना लोकशाहीतील जनता धडा शिकवल्याशिवाय स्वस्त बसत नसल्याचा राजकीय इतिहास आहे. देशातील सर्वच राज्यकर्त्यांनी लोकशाही आणि संविधानाचे रक्षण केले पाहिजे, सामान्यांचे हित जोपासले पाहिजे.

जनता भाजपला भुलनार नाही

धैर्यशील मोहिते-पाटील म्हणाले, मोहिते-पाटील गटामुळेच गेल्यावेळी भाजपचे खासदार विजयी झाले, हे सर्वश्रुत आहे. पवार साहेबांनी मला माढ्याची उमेदवारी दिली आहे. फलटणचे राजघराणे आमच्या पाठीशी असून माझी विजयाच्या दिशेने वाटचाल सुरू आहे चिंता करण्याचे कारण नाही. भाजप माढ्यात विकासाची भाषा करते. मात्र, या विकासाचा पाया विजयदादा व रामराजे यांनी घातला आहे, हे आम जनतेला माहित आहे. दुसऱ्यांनी केलेल्या विकासाचे फुकटचे श्रेय घेण्याचा अधिकार भाजपला नाही. जनता भाजपच्या भूलथापांना भूलनार नाही.

राजघराण्यातील युवकांचे राजकारणातील अस्तित्व टिकविण्यासाठी धैर्यशील मोहिते यांच्या पाठीशी

श्रीमंत रघुनाथराजे म्हणाले, गेली पाच वर्षे खासदार गटाने आमच्या कार्यकर्त्यांना खूप त्रास दिला. खोट्या पोलीस केसेस केल्या. आमच्या वंशावळी दाखविल्या तरी खासदार हे आमच्या घराण्यातील नाहीत. चुकीच्या पद्धतीने प्रशासनावर दबाव आणून कार्यकर्त्यांना त्यांनी त्रास दिला, त्यामुळे आम्ही त्यांना राजकीय सहकार्य करण्याचे कारणच काय ? आमचा आदर्श एकच आहे तो म्हणजे शरद पवार. मी शेवटपर्यंत त्यांच्या सावलीत राहणार. मला राजे गटाने बाहेर काढले तरी चालेल. राजघराण्यातील अदृश्य शक्ती ही आमच्या पाठीशी आहे. राजघराण्यातील युवकांचे भविष्यातील राजकारणातील अस्तित्व टिकविण्यासाठी आम्ही आज धैर्यशील मोहिते यांच्या पाठीशी आहोत. त्यांना या निवडणुकीत निश्चित यश प्राप्त करून देणार आहोत.

यावेळी सह्याद्रीभैया कदम, बजरंग खटके, धैर्यशील लोखंडे, सक्षणा सलगर, श्रीमंत शिवांजलीराजे नाईक-निंबाळकर, प्रतिभाताई चेतन शिंदे, विकास नाळे, शंभूराज खलाटे, श्रीमंत विश्वजीतराजे, श्रीमंत अनिकेतराजे, अनिल देसाई आदींची भाषणे झाली. उपस्थित मान्यवरांचे स्वागत राष्ट्रवादी शरद पवार गटाच्यावतीने करण्यात आले. प्रास्ताविक श्रीमंत विश्वजीतराजेंनी केले. आभार प्रा.भीमराव बुरुंगले यांनी मानले. सूत्रसंचालन प्रमोद रणवरे यांनी केले. सभेस शरद पवार गटातील युवक, युवती, महिला आघाडीचे पदाधिकारी, कार्यकर्ते मोठ्या संख्येने उपस्थित होते.

बारामती सदैव तुमच्या पाठीशी 

सत्ताधाऱ्यांच्या राजकीय वर्तनावरून आज लोकशाही टिकते की नाही अशी शंका येऊ लागली आहे. भारतीय संविधानाने दिलेल्या मूलभूत हक्क आणि अधिकारांची पायमल्ली होता कामा नये. भारतीय संविधान बदलण्याची भाजपची पावले सर्वसामान्यांनी ओळखली आहेत. विजयसिंह मोहिते-पाटील, रामराजे, संजीवराजे यांची आपणास साथ होती. या सर्वांचे प्रयत्न या भागाचा चेहरा-मोहरा बदलण्याचे होते. फलटण विधायक कामांचा आदर्श आहे. मात्र, येथील लोकांना यातना देण्याचे काम भाजपचे लोक करीत असतील तर त्यांना धडा देण्याची योग्य वेळ आली आहे. सामूहिक शक्तीने विकास होत असतो. आज महाराष्ट्राचं चित्र बदलतंय यासाठी धैर्यशील मोहिते-पाटील यांना संसदेत पाठवा. मी स्वतः संसदेत त्यांच्या पाठीशी राहिन याची ग्वाही देतो, असे सांगत रघुनाथराजे तुम्ही एकटे नाही तर फलटणच्या पाठीशी सदैव बारामती राहील चिंता करू नका, असे आश्वासन शरद पवार यांनी याप्रसंगी राजघरण्यातील व्यक्तींना दिले.