गुणवरे ग्रामपंचायत सरपंचपदी सौ. आधिका गावडे व उपसरपंचपदी विलास चव्हाण यांची बिनविरोध निवड

गुणवरे : गुणवरे (ता. फलटण) ग्रामपंचायतच्या सरपंचपदी सौ. आधिका उत्तमराव गावडे व उपसरपंचपदी विलासराव चव्हाण यांची बिनविरोध निवड करण्यात आली आहे. सौ. शशिकला जिजाबा गावडे, प्रा. रमेश तुकाराम आढाव यांनी आपल्या सरपंच व उपसरपंचपदाचे राजीनामे दिल्यामुळे रिक्त झालेल्या दोन्ही पदांसाठी निवडणूक कार्यक्रम जाहिर करण्यात आला होता.

दि. २५ ऑगस्ट रोजी दुपारी २ वाजता सरपंच व उपसरपंच पदाची निवड कार्यक्रम गुणवरे ग्रामपंचायतमध्ये विशेष सभेद्वारे आयोजित करण्यात आला होता. दरम्यान सकाळी ११ ते १२ यावेळेत ग्रामपंचायत सदस्या सौ. आधिका गावडे यांनी सरपंच व उपसरपंचपदासाठी विलास चव्हाण यांनी आपले अर्ज निवडणूक निर्णय अधिकारी यांचेकडे दाखल केले होते.

विरोधी गटाकडून या दोन्ही पदांसाठी अर्ज दाखल न झाल्यामुळे विशेष सभेचे अध्यक्ष तथा निवडणूक निर्णय अधिकारी दिलीपकुमार कोकरे यांनी सरपंच व उपसरपंचपदासाठी दाखल असलेल्या अर्जाचे वाचन करून सरपंचपदी सौ. अधिका गावडे आणि उपसरपंचपदी विलास चव्हाण यांची बिनविरोध निवडी करण्यात आल्याची अधिकृत घोषणा केली. याप्रसंगी ग्रामसेवक शिवाजीराव भोसले, गावकामगार तलाठी माने उपस्थित होते. सौ. गावडे व चव्हाण यांच्या निवडीची घोषणा होताच त्यांच्या समर्थकांनी फटाके फोडून गुलालाची उधळण करत आनंद व्यक्त केला.

मावळते सरपंच सौ. शशिकला गावडे व उपसरपंच प्रा. रमेश आढाव यांनी नवनिर्वाचित सरपंच व उपसरपंच यांचा सत्कार करून आगामी काळातही आम्ही ग्रामपंचायत सदस्य म्हणून नवनियुक्त सरपंच, उपसरपंचांना ग्रामपंचायतच्या कामात सहकार्य करणार असल्याची ग्वाही दिली.

यावेळी सहाय्यक निबंधक सहकारी संस्था (इंदापूर) जे.पी. गावडे, जिल्हा परिषदेचे माजी सदस्य शिवाजीराव गावडे, श्रीराम कारखान्याचे संचालक विठ्ठल गौंड, श्रीराम बझारचे संचालक बापूराव गावडे, हनुमान सोसाटीचे चेअरमन प्रकाश गबाजी गावडे, दीपक शामराव आढाव, किशोर आढाव, गुणवरे सोसायटीचे संचालक सुरेश रामहरी आढाव, दयानंद आढाव, लालासाहेब आढाव, महादेव गावडे, उत्तमराव गावडे, भारत आढाव (फौजी), यांच्यासह ग्रामपंचायतचे माजी सरपंच विद्यमान सदस्य शिवाजीराव गावडे, अजित कणसे, सौ. सविता आढाव, सौ. सुनिता घुले, सौ. नाळे आदींनी नवनिर्वाचित सरपंच सौ. आधिका गावडे, उपसरपंच विलास चव्हाण यांचे अभिनंदन केले.

डॉ. बाबासाहेब आंबेडकरांना अभिवादन

नवनिर्वाचित सरपंच व उपसरपंच यांनी ग्रामदैवत भैरवनाथाचे दर्शन घेत डॉ. बाबासाहेब आंबेडकर चौकात असलेल्या सामाजिक सभागृहात जावुन डॉ. बाबासाहेब आंबेडकरांच्या प्रतिमेला पुष्पहार घालुन अभिवादन केले. याप्रसंगी सरपंच व उपसरपंच यांनी आगामी काळात सर्व सदस्यांना बरोबर घेवुन ग्रामपंचायतच्या माध्यमातून विविध विकासाची कामे करणार असल्याची ग्वाही दिली.