निरा देवघर प्रकल्पातील बंदिस्त वितरण नलिका कामाची निविदा प्रसिद्ध

एकता दर्शन: नीरा देवघर प्रकल्प अंतर्गत मुख्य बंदिस्त वितरण नलिकेच्या पहिल्या टप्प्याची निविदा प्रसिद्ध झाल्याने फलटण, माळशिरस, सांगोला भागातील पाण्याचा प्रश्न मिटला असून प्रत्यक्ष कामाला सुरुवात होणार असल्याने या तीन तालुक्यातील शेतकरी वर्गात आनंद व्यक्त केला जात असल्याची माहिती खासदार रणजितसिंह नाईक निंबाळकर यांनी दिली.

निरा देवघर धरणातील पाण्यावर फलटण, माळशिरस, सांगोला या तीन तालुक्यांचा हक्क होता, मात्र कालवे न झाल्याने या धरणातील पाणी इच्छित ठिकाणी पोहचू शकले नाही. निरा देवघर धरण प्रकल्पाला तब्बल ४० वर्षे झाली. तालुक्याच्या पाणी प्रश्नावर अनेकांनी राजकारण केले. त्यामुळे या प्रकल्पातील कालवे पूर्ण होऊ शकले नाहीत, अशी खंत व्यक्त करीत उपमुख्यमंत्री देवेंद्र फडणवीस यांच्या सहकार्यामुळेच नीरा देवघर मधील कालव्यांचे काम पूर्ण होणार असून फडणवीस यांच्या वाढदिवसाचे औचित्य साधून मुख्य बंदिस्त वितरण नलिका कामाच्या पहिल्या टप्प्याची निविदा प्रसिद्ध झाली असल्याचे खासदार रणजितसिंह यांनी सांगितले.

या कामासाठी २९५० कोटी रुपये खर्च अपेक्षित असून त्यातील पहिल्या टप्प्यात कि.मी. ६६ ते ७६ दरम्यानच्या कामासाठी २३५ कोटींची निविदा प्रसिद्ध झाली आहे. लोणंद ते फलटण तालुक्याच्या हद्दीपर्यंत बंदिस्त वितरण नालिकेचे काम पूर्ण होणार असून उर्वरित पुढचे काम टप्प्याटप्प्याने केले जाणार आहे. त्यामुळे या वर्षाखेरीस माळशिरसच्या शेवटच्या टोकापर्यंत काम पूर्ण होऊन पाणी पोहोचणार आहे. या वितरण नालिकामुळे फलटण, खंडाळा, माळशिरस, पंढरपूर व सांगोल्यातील काही भागाला पाणी उपलब्ध होणार असून या भागाचा कायमस्वरूपी दुष्काळ संपणार आहे. तिन्ही तालुक्यातील गावांना याचा फायदा होणार असल्याने माझ्या मतदारसंघाच्या दृष्टीने हा क्षण भाग्याचा असल्याचे खासदार नाईक निंबाळकर यांनी सांगितले.

माजी खासदार स्वर्गीय हिंदुराव नाईक निंबाळकर यांनी या भागातील पाण्याचा दुष्काळ संपवण्यासाठी जे स्वप्न पाहिले होते ते आज पूर्ण होताना दिसत आहे. फलटण तालुक्यातील गावांना याचा लाभ होणार असल्याचे सांगत तालुक्यातील सत्ताधाऱ्यांनी या प्रश्नासंबंधी प्रयत्न केल्याचे दिसत नाहीत. परंतु मी खासदार झाल्यानंतर तालुक्याचा अत्यंत जिव्हाळ्याच्या विषयाचा महाराष्ट्राचे उपमुख्यमंत्री देवेंद्र फडणवीस यांच्याकडे सातत्याने पाठपुरावा करून बैठका घेऊन मान्यता घेतली. मान्यता मिळाल्यानंतर आज प्रत्यक्ष या कामाची निविदा प्रसिद्ध झाली असल्याचे खासदार नाईक निंबाळकर यांनी सांगितले.